Хүний сайхан үр минь

Миний сайхан амраг минь

Яахав бусдын нүдэнд чи

Ямар харагддаг нь хамаагүй,

Яруу найрагчийн нүдэнд л чи

Яруу найраг болж харагддаг юм.

 Өөрийн минь харснаар хараагүй хүн

Өөрчлөөд өөрчлөөд шүлэглэхгүй

Өөрөөс минь илүүгээр харлаа ч тэд

Өргөж бас илүү шүлэглэж чадахгүй.

Олж харснаараа би

Онож чамайгаан шүлэглэнэ.

Зургаас амьд шүлгээрээн зурж

Зуун зууныг давуулан үлдээнэ.

Хүний сайхан үр,

Миний сайхан амраг минь 1974.08.09. Р.Чойном